La Esperanza, Calviño e
Servia. Tres marcas de gaseosas que se facían en distintos lugares de Fene.
Tamén en Ferrol, Mugardos, Narón, Neda, Valdoviño e Cedeira houbo fábricas de
gaseosas, algunha tan coñecida e duradeira como Los 15 Hermanos. A historia das
fábricas de gaseosas da provincia recóllese en “Apuntes sobre a gaseosa na
provincia da Coruña”, un libro que acaba de saír do prelo. Publicouno a
Deputación da Coruña. En Radio Fene falamos co seu autor, Juan Carlos Villar
Angeriz, que tamén preside a Asociación Gaseosas de Galicia.
ESCOITA O
PODCAST:
http://173.255.131.18/audio/010323VILLAR.mp3
“En Galicia xa se facía gaseosa
negra antes de que chegara a España a Coca Cola, facíaa en Mugardos o señor
Zárate”, pero non tivo éxito. Segundo lle contou a Juan Carlos Villar un
descendente deste pioneiro mugardés, a clientela rexeitaba esta innovación “dicían
non nos dea auga das pozas, non era atractiva pola súa cor e non tivera ningún
éxito”. O autor ten en Coristanco unha gran colección de envases e materiais
relacionados coa fabricación de gaseosas na provincia da Coruña, que chegou ser
un negocio importante en Galicia. “Na comarca de Ferrol houbo moitas fábricas,
Los 15 Hermanos é unha das míticas, co seu famoso logo dos monequiños, fundouna
nos anos 30 unha familia de gaseoseros moi ligada a comarca, aínda que houbo
outras. Case en cada concello houbo unha fábrica. Houbo moitas na comarca de
Ferrol”. Facer gaseosa chegou a ser un negocio importante. “Nos concellos máis
pequeniños viviron moi ben e nos maiores creáronse empresas grandes que deron
emprego. En Carballo chegou a haber cinco fábricas no seu momento”. A gaseosa
lémbrase como bebida popular, pero non sempre foi así. “As primeiras datan de
finais do século XIX. Eran formatos máis cativos, unha moda importada de París
e Londres, para a burguesía que a consumía cando saían pasear, nos quioscos dos
parques e nos grandes cafés que había nas capitais. Nese momento non era
accesible a todo o mundo, era un luxo só para as clases máis podentes, que
tamén a consumían para axudar a facer as dixestións”. “Apuntes sobre a gaseosa
na provincia da Coruña”. A nosa historia, desde o século XIX ata a década dos
80, retratada a través desta popular bebida.
Ningún comentario:
Publicar un comentario